ممرضة تكشف كيف يتحرش أطباء النسا بالسيدات أثناء الكشف.. شهادة تعرضها للتحرش أثناء السونار من دكتور نسا وتوليد كبير

ممرضة تعرضت للتحرش أثناء الكشف تسرد كيف تحرش بها دكتور نسا وتوليد كبير والكل يشهد باحترامه !

من شهادات السيدات عن تحرش الأطباء: (1)

طيب هحكيلك حاجه عشان انا كنت فالاول بروح لدكاتره رجاله لحد محصلي الموقف دا ومن ساعتها مبروحش

بص هو دكتور نسا وانا لما اتجوزت اكتشفت مشاكل فالرحم منعاني اني احمل
مشاكل حقيقه

المهم لفيت انا وجوزي شويتين ولا حد بيفيدنا ولا حاجه بتحصل
لحد مقالولي ع دكتور نسا كويس خالص وحرفيا كل ال بتروح ليه عندها مشاكل بتتحل وال مبتحملش بتحمل
فقولنا هنروحلو

روحنا اول مره ودخلت انا وجوزي ومامتي واول مجوزي فتح الباب عشان ندخلو انا ببص طبعا وانا داخله لقيت عينو جت عليا انا وزي فتح عنيه كده وابتسم وبص لجوزي وقالو اتفضل ودخلنا

هو الدكتور بطبعو خجوول فاطمنت لان الناس الخجوله مبيتطاولوش ابدا
المهم ماما وجوزي بيتكلمو ويحكولو وانا ساكته فقالي انتي مش هتتكلمي خالص مش محتاجه تقولي حاجه
قولتلو هو نفس الكلام ال قالوه

بدأ يسالني اسأله شخصيه جدا عن العلاقه بيني وبين جوزي قولت عادي طبيعي دكتور نسا وكل معلومه هتهمو

بعدين الايام عدت وخدت علاج وحملت وكان كل ال بشوفو كل مره لما اروح ابتسامات وطريقه محايله للخوف ال عندي لمحملش بطريقه غير طبيعيه زي طريقه المخطوبين

مولدتش عندو لاني روحت محافظه تانيه فالفتره دي واضطريت اولد عند دكتور تاني هناك وللاسف برضو حصل من الدكتور التاني دا خطأ طبي دمرني بعد كده

المهم رجعت المحافظه تاني وروحت لنفس الدكتور عشان اعاالج الاخطاء دي لان كان لازم فتح بطن تاني وكانت كشوفات عاديه

لحد مكلمتو ف يوم عرفتو اني تعبانه وكنت كشف ع فيزيتا اونلاين وقالي الدكتور مش محتاجه كشف خدي العلاج دا وخلاص والعلاج مجابش نتيجه فروحتلو

وهناك كنت روحت لوحدي لان مكنش حد متاح يجي معايا وكنت تعبانه وطلب مني اعمل سونار مهبلي وطبعا قولتلو هو هيظهر حاجه يعني غير ال بقولو قالي اه

قولتلو طب ممكن انادي عالبنت برا السركتيره قالي والله عيب هو انا هاكلك لما انتي خايفه جايه ليه قولتلو لا مش خايفه وقمت عملت السونار وحرفيا حسيت بالم من كتر مالسونار عمال يخبط ف جدا البطن

وانا ممرضه وعارفة السونار بيتعمل ازاي خدت بالي انه بيتعمد يطول ويدخل السونار ويخرجه اكتر من مره ويلف وحجات غريبة لغرض مش كويس ويخبطه كانه بيدور ع حاجه تايهه
ودي حاجه مش سهله انا عامله سونار قبل كده كتير ومبيتعملش ف كده خالص

وكل شويه يقولي افتحي رجلك افتحي رجلك بصوت ممحون قرفني منو ولما قمت عمال يتكلم وباين ع عنيه ان ف حجات كتير اتحركت ونفسو بقي اعلي بس مش اوفر بس متلاحظ معرفش كان قاصد يوصلي دا ولا أي

وكمان فضل قبل الكشف يتعمد يسال أسئلة مش مريحة عن العلاقة ومكان القذف وكنت قولتلو قبل كدا اني سعات بحس بالم فقالي ف اي وضع وقعد يسال والوضع كذا وكذا ومردتش عليه كنت لوحدي قولتلو هو دا بس عشان يسكت

ومن ساعتها مروحتش ليه تاني ابدا ابدا ولا حكيت لمخلوق ال حصل لان جوزي مكانش هيرحمو وللاسف الدكتور معرفه لدكتور جوزي يعرفو وجوزي فاليوم دا قالي خليكي لما اجي وانا كنت تعبانه وقالي خدي حد معاكي وماما كلمتها كانت عند دكتور الاسنان ومش هتخلص دلوقتي خالص

دا غير انو كان بيبعت كتير ليا يسالني عن حالتي ومره سالني اتجوزتي ازاي انتي وجوزك قولتلو النصيب كان بيشال كتير عني وجوزي وجوازنا وبتاع
ومره قالي انو عاوز يتجوز ع مراته قلتلو ربنا يوفقك ويسهلك

كانت ردودي عليه في الرسايل عاديه واقول غلبان لكن بعد الموقف بتاع السونار انا قرفت وكرهتو وكرهت نفسي اني روحت لوحدي واني مديتوش بالشلوط ف وشو لما كان بيعمل السونار

انا بعد كده الموقف فضل تاعبني لانه استغل وجودي لوحدي. محدش كان هيقف جمبي ساعتها
وانا خوفت واتحرجت وهو محترم جدا قدام كل الناس لو كنت عملت حاجه عليت صوتي كانو هيمرمطوني
واكتشفت في الاخر انو كده مع الكل بنفس الابتسامهً الوسخة وكده

انا معترفه اني غلطانه من البدايه
لاني قبلت بحجات تكاد تكون حجات عبيطه ف سبيل اني احمل

زي انه قالي كتير انتي قموره ماشالله وكنت بقولو شكرا تسلم ودا غلطي
و برضو يوم السونار قالي قدام السكرتيرة منقدرش نزعلها احنا مبنشوفش الناس الحلوه دي هنا كتير
فمجاش ف دماغي حاجه راجل كبير وبيقول قدام السكرتيره وشكرا وخلاص
وبعدها السكرتيرة خرجت عشان كان ف ناس عاوزه تقطع كشف

بس انا ممرضه وفاهمه القرف دا
وكنت بشوف الدكاترة بيعملوا البلاوي دي لما كنت شغالة في كشك النسا وكنت بشوفهم بيتسابقوا ازاي عشان يكشفوا
انا من اول مدخلت لوحدي وانا مقرره مش هروحلو تاني

انا بحكي دلوقتي وعاوزه كل البنات تفهم لان بجد الموضوع وحش واوفر
والدكتور مهما كان باين عليه محترم او كويس هو فالاخر راجل وغصب عنو هيتحرك

والمجال مفتوح قدامو وممكن احكيلك مواقف حصلت قدامي ف كشك النسا
حرفيا حتي البنات الصغيره البنت بنوت كان الكلام عليها اوفر بعد متمشي والكل عاوز يجري يكشف هو

طبعا مستشفي حكومي والناس غلابه مش معاهم فلوس يروحو يدفعو ٤٠٠ جنيه ف كشف بس وكانت بنات مش محتاجه كشف يدوي اصلا وكانو يسكتو ويكشفو بس عشان الدكتور ميكتبلهاش اي حاجه ولا بتاع

وأنا سيبت المجال لاني مستحملتش كميه الوساخة والقرف ال بيحصل فيه

عارفه اني غلطانة اني استحملت مضايقتو البسيطه عشان بس الخطا الطبي عملي ورم من الانفكشن وهو كان متخصص ف دا وشاطر جدا بس لما كنت فالموقف نفسو مكنتش عارفه اتصرف ازاي وعاوزه اخلص وامشي

--

** تعقيب: رجاءاً محدش يغلط في صاحبة القصة اللي قررت تشاركها معانا عشان توعي الناس بتحرش الأطباء..
والأفضل اننا نحترم اعترافها بغلطها زي ما حكت وانها قررت توعي غيرها من البنات عشان ميحطوش في نفس المواقف.
وعشان غيرها يتشجع ويحكي قصته مع تحرش الأطباء.

ممكن تشوفوا كوارث تحرش تانية على هاشتاجات وقنوات تليجرام:

#دكتور_النساء_الراجل - رابط قناة تليجرام: https://t.me/MaleGynoDr

#جرائم_البالطو_الابيض - رابط قناة تليجرام: https://t.me/DoctorCrimes