الحقيقة اللي مش هيقولوهالك، أن الموضوع مش تدين، ولا حتى جهل بالدين.
هي بتبقى قاصدة كدا من باب احتقاره اللي هو إنك أقل من أنك تقيمني أو أن يكون لك معايير، أو أن الرفض يبقى من جهتك.
وحصل الجدل والتريند دا قبل كدا، وأغلب التعليقات هتكتشف منها إن دا السبب الخفي.
++
صح كلامك!
هو مش اترفض من شخص عشان شكلي مش حلو.
وبتبقى عارفة إما إنه أعلى من مستواها شكلا ومضمونًا ومالًا وأصالة، فبتطلع بالشكل دا لأنه هايرفضها قطعًا.
أو بيكون أقل جدًا ومش موافقة عليه احتقارًا له.
ليه أغلب البنات بما فيهم المنتقبات والمختمرات بيتضايقوا من المنشورات دي رغم أنها صحيحة؟
المشكلة الأولى تكمن في الجهل بدين الله؛ لأننا لو بحثنا في الحكم الشرعي هنلاقي إن ده حلال شرعًا بل هو المطلوب أصلاً
المشكلة الثانية تكمن في الأفلام الوردية الرومانسية التي علمتنا أشياء بعيدة عن الواقع تمامًا.
أغلب البنات عايشين في السيناريو بتاع واحد يحب واحدة ومستعد يعمل أي حاجة عشانها وإحنا نتخيل بقى فارس الأحلام اللي راكب مرسيدس وسيتزوجني فقط لجمال ابتسامتي وطيبة قلبي.
كل ده وصّل للبنت فكرة إن "جسدي بتاعي أنا فقط وهو المفروض يتجوزني عشان جمال ضحكتي وروحي الحلوة، ومش من حقه ينظر لأي شيء تاني وإلا هيبقى إنسان سطحي وبيهتم بالشكل فقط و..إلخ"
عيشوا في الواقع شوية يا حبايبي!
أنتِ لما بيتقدم لك شخص مش بتبقي حاطة معايير معينة أنتِ وأهلك في المستوى العلمي والاجتماعي والمادي؟ مش بترفضي أوقات شخص عشان ماقدرتيش تتقبليه؟
الرجل كذلك إنسان عنده إحساس زيك والله بالضبط وحاطط لنفسه معايير
وأضيف إن طبيعة الرجل مختلفة ومش بيفكر بنفس طريقتك.
العالم المثالي الرومانسي الوردي ده مش موجود غير في الجنة إن شاء الله
طيب مش المفروض إن الخاطب ينظر إلى الوجه والكفين فقط؟
-لا مش شرط، العلماء مختلفون؛ لأن النبي كلامه كان عام:
(عنِ المغيرةِ بنِ شعبةَ أنه خطب امرأةً فقال النبيُّ صلَّى اللهُ عليهِ وسلَّمَ: انظُرْ إليها فإنه أحرى أن يُؤدَمَ بينكما)
عَنْ جَابِرِ بْنِ عَبْدِ اللَّهِ رضي الله عنهما قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: (إِذَا خَطَبَ أَحَدُكُمْ الْمَرْأَةَ فَإِنْ اسْتَطَاعَ أَنْ يَنْظُرَ إِلَى مَا يَدْعُوهُ إِلَى نِكَاحِهَا فَلْيَفْعَلْ)
طيب، ماذا يدعوه إلى نكاحها؟ لذلك حدث خلاف
فممكن واحد يتمنى زوجته بشكل معين، يعمل إيه وقتها؟
يتجوز واحدة هو مايعرفش إذا كانت مناسبة له ولا لأ وبعدين يرجعوا يشتكوا من بعض؟!!
بلاش العيش في الأفلام الوردية وجو جئتك لأجل الباذنجان فلا داعي لطبخ البامية (جئتك لأجل الأخلاق فلا ترفعي النقاب) والكلام المضحك اللي بنشوفه في الروايات!
طبعًا مش المقصود إنك تلبسي ضيق لكن يكون لبس يبين الوزن والشكل التقريبي للجسم، مايكونش لبس مش موضح إذا كنتي ٥٠ ولا ٨٠ كيلو!
أمينة عباس -بتصرف-.
+++
أنا اللي مزعلني إن الجهل ده منتشر بين فئة الفتيات الملتزمات، اللي المفروض هن أكثر الناس علمًا بالدين. معقول ولا واحدة فيكم قابلتها الحديث بتاع الرسول اللي تم ذكره في البوست؟ طيب لما قابلكم فهمتوه إزاي بجد والله؟
وبعدين، ملحفة إيه اللي تطلعي بيها يا حبيبتي؟ أنتي لو خبيتي فيها اخوكي الصغير معاكي، محدش هياخد باله.
أسوأ حاجة الإنسان لما يبقى جاهل شرعًا ويبقى فاكر نفسه متدين وورع.
++
قابلتني مشكلة من كام يوم لواحد بيقول إن خطيبته في أول رؤية قعدت بفستان واسع جدا لدرجة ما قدرش يحدد وزنها الحقيقي، ويشاء القدر إن في مرة من المرات وهي بتحرك حاجة رجلها بانت من الدريس بالغلط فأخد باله إنها أسمن مما كان يتوقع فاتضايق.
طبعًا معظمكم اللي هيقرأ المشكلة هيلوم الرجل ويتهمه بالسطحية لكن الملام الحقيقي هي البنت لأن تصرفها مكنش صحيح في إنها تطلع في الرؤية بدريس واسع لدرجة إن الخاطب مايقدرش يحدد وزنها الحقيقي.
أتمنى من الفئة بتاعة يعني هو الجسم كل حاجة؟ يركنوا على جنب عشان المرارة واحدة.
أمال اسمها رؤية شرعية ليه؟
+++
هم ليه مستغربين من ده مع إن دي معلومة مفروض يكونوا عارفينها أساسًا؟!
+++
التعليقات عند صاحبة البوست كانت في قمة الجهل، ودخلوا هاجموها جامد.
+++
إيمان سعيد:
شوفت بنات كتيرة مشاركات البوست وبتتريق، وللأسف البنات دي سمتها الإلتزام، وفي التعليقات قالوا بيدخلوا بالملحفة! 😂
واللي مختمرة وبتلبس جوانتي دخلت بالجوانتي! ده أنا منتقبة واستحي أسويها! 😂😂😂😂
كان من كام سنة راجل اتكلم في الموضوع وانتقده راحوا شتموه 😂
وعلى الجانب الآخر البوست الأصلي هو صح، بس يعتبر إثارة جدل، كان المفروض توضح..
+++
دول لو عرفوا أن بعض أهل العلم زي الحنابلة أجازوا النظر لشعرها كمان ممكن يروحوا فيها.
+++
لو كتبتي في البوست إن فيه إجازة بأنه يشوف شعرها مش بعيد يقيموا عليكي الحد.
+++
خصوص البنات اللي هتقول "مش في الرؤية الأولى ده لو حصل قبول بعد الرؤية الأولى"
هو حضرتك أي واحد في الشارع هتدخلوه بيتكم وتقولوا له اتفضل أقعد مع بنتنا؟
الأول هو بيقعد مع والدك ورجال بيتك، ولو حصل قبول، والدك بيسأل عليه، وبعدها لو لقاه متدين ومحترم وأهله كويسين، والدك بيكلمك وبياخد رأيك، وعلى الأغلب بيحصل موافقة مبدئية منك وبيدخل البيت!
وبعدين هو في الرؤية بيبقى محتاج يشوف وشك وهيئتك عشان يحدد هو هيقدر يعمل رؤية تانية ولا لأ، ما ممكن شكلك ما يعجبهوش ويرفض ييجي تاني! مش انتي بس اللي تحددي وتقيمي!!
+++
البنت من دول تتمنى زوج: رومانسي، حافظ للقرآن، ملتحي، طوله ١٨٠ (لو ١٧٠ هتقوله امشي يا قصير)، ووزنه مضبوط على طوله (لو وزنه زيادة هتقوله امشي يا تخين)، ويبقى رقيق، وعنده حسنة في خده الشمال، ومعاه وظيفة، وشقة ملك وعربية، وبيرشق في الحيط ويطير ويعمل خمسات.
هي برضو لما نقولها ما تطلعيش بالنقاب والخمار في الرؤية الشرعية: اعععع انتي عايزاني ابقي رخيصة ؟؟!!!
