أفضل طريقه لهز ثقة أي شخص في أي فكره يتبناها هي إنك تسيبه يتكلم عنها أكتر. في دراسه لطيفه بتتكلم عن إن وهم المعرفة illusion of knowledge بيقل مش بمواجهة الفكره والإعتراض عليها لكن من خلال إنك تسيب الفرد يتكلم ويشرح فكرته أكتر وتسأله أسئله عن الإصطلاحات والآليات والمبادئ اللي ورا الفكره اللي بيتبناها، وكل ما يتكلم أكتر ويتشعب في الفكره أكتر بيدرك إنه ميعرفش بالقدر الكافي أو ممكن يكون ميعرفش حاجه أصلاً عن الأفكار اللي بيتمسك بيها وبيدافع عنها. الدراسه دي تم تطبيقها على الناخبين اللي بيتحيزو جداً لمرشحين وبرامج إنتخابيه. اللي الدراسه دي كشفته هي إن ثقة الناخبين في الأشخاص والأفكار اللي بيرشحوهم قلت بشكل ملحوظ بعد ما إتسألو أسئله عن الإصطلاحات وآليات التطبيق اللي بيقولها المرشحين في برامجهم الإنتخابيه.
إحنا كبشر كائنات تميل إلى تبني الأفكار السلطويه المريحه اللي تحسسنا إننا فوق وكل المختلفين تحت .. إحنا الصح والباقي غلط .. إحنا محور الكون والكل بيتآمر علينا عشان يفقدنا الـ superiority بتاعتنا .. إحنا أفضل مجموعه بشريه والأقرب للحقيقه .. وهكذا. كل الأفكار دي ليها defense mechanisms بتخلي الشخص ميسمعش أو يسمع وميفهمش، والحل معاها مش الصدام بأفكار مشابهه معاكسه. الحل ببساطه هو إنك تسيبه يتكلم، يكشف كل مغالطاته، كل إنحيازاته، كل لا منطقيته، كل هجومه الشخصي وهشاشة أفكاره، وبعد كده تسأله الأسئله السهله المباشره البديهيه اللي هو نفسه هايكتشف إن معندوش إجابات عليها.
ده لينك الورقه البحثيه اللي بتتكلم عن التجربه اللي ذكرتها في البوست:
Political extremism is supported by an illusion of understanding, by Philip M Fernbach, Todd Rogers, Craig R Fox, Steven A Sloman
التسميات
أدب