متهم يستحق الحبس

  أحياناً المتهم يستحق الحبس، مش عشان مذنب، لأ عشان عْبي.

مرة حضرت تحقيق مع أخو موكل عندي اتقبض عليه من فرط سذاجته وثقته في الناس، فضلت اتكلم معاه قبل التحقيق أكتر من ساعة احفظه القصة اللي هيحكيها قدام النيابة والاجابات اللي هيرد بيها على كل سؤال.

وأكدت عليه: كلامك كله مختصر وعلى أد السؤال، واياك تثق في أي حاجه يقولهالك وكيل النيابة، وأي سؤال متفقناش عليه ترد: معرفش/محصلش/مش فاكر.

دخلنا قدام وكيل النيابة، وبعد ما أمين الشرطة فك الكلابشات وخرج، لقيت وكيل النيابة بيقوله انت شكلك "ابن ناس يا محمد! .. مش حرام يابني تعمل في نفسك كدا! .. انت مش وش العيال المتهمين اللي برا"..

لسه هتكلم، فجأة لقيت الواد عيَّط وقاله "اه والله يا فندم، ده أنا أول مرة أدخل قسم"، وقام حكاله كل اللي حصل !!

وكيل نيابة قاله متخافش وانت شكلك محترم وانا هطلعك نخلص بس التحقيق الأول.. واتفتح التحقيق وأنا قاعد هشد في شعري.

سأله: عن ايه اللي حصل حكاله وبالتفاصيل، سأله عن الحرز قاله بتاعي، سأله عن وقت القبض عليه قاله الساعة بالظبط..

طول التحقيق كنت قاعد زي "حسن حسني" في فيلم غبي منه فيه، في مشهد الكيلو 270، لدرجة ان وكيل النيابة بقي يسألني فيه حاجه يا استاذ؟..

قاعد بهبد برجلي في الأرض وأضرب بإيدي علي راسي واخبط بكفي علي فخدي وأبرق وأبص للسقف وأكح، عسى البعيد يفهم، مفيش أي فايدة !

في الآخر بعد ما اتكلمت كلمتين في المحضر والتحقيق وابديت الدفوع، وكيل النيابة بمنتهي الانشكاح بيسألني طلباتك ايه يا أستاذ أسامة ؟

قولتله حبس المتهم 4 أيام على ذمة التحقيق احتياطياً.. ضحك وقالي طب وأصلياً؟ قولتله محمد يروح بعد التحقيق زي ما حضرتك وعدته. وخدت نفسي ومشيت..

المضحك والمستفز بعد كل ده إن المتهم بعد ما اعترف بكل حاجه، كان واقف بيضحك ومبسوط ومفكر أنه هيروح بجد واني أنا ووكيل النيابة بنهزر معاه وبننكشه.

أسامة صهيون